धिरज राईः स्टेज किङ ब्याक अगेन

उनको गोडामा डिंगो बुट थिएन । पहिलेझैं बेली जिन्स उनले लगाएका थिएनन् । ज्यानमा फिटिङ्स ज्याकेट थिएन । अनि गलामा लकेटहरु पनि झुण्डिएका थिएनन् ।

कुनै बेलाकाका ‘स्टेज किंग’ धिरज राई यसपालि फरक हुलियामा देखा परे ।

अनामनगरको एक क्याफेमा हामीले भेटदा उनी चुज जिन्स, टिसर्ट, स्पोर्टस् सुजमा ठाँटिएका थिए । झ्याप्ले केस पालेका रहेछन् ।

‘सधैं एकैनासको धिरज राई दर्शकलाई रुच्दैन । समयअनुसार आफूलाई अपडेट गरिएन भने पुरानै ढर्राको भइने रहेछ’, तात्तातो कफी सुक्र्याउँदै उनले हुलिया बदल्नुको रहस्य खुलाए ।

करिअरको पूर्वार्द्धमा उनी बेली जिन्स लगाउँथे । अर्थात्, कम्मरतिर सुकेको र खुट्टातिर फुकेको । अहिले ठीक उल्टो । खुट्टाको भागतिर खुम्चिँदै गएको पाइन्ट, फिटिङ्स । त्यसबेला फाटेको (ग्रन्च) जिन्स लगाउन नपाइने । अहिले ग्रन्च जिन्स नलगाए ‘पुरानै स्टाइल’को भइने डर ।

एक जमाना थियो, धिरजको । स्टेजमा उनी ‘तिम्रा नयन’, ‘तिमी रुँदा’, ‘लुकी लुकी’, ‘मिस्टिरियस गर्ल’ गाउँदै बेपत्तासँग नाच्थे । दर्शकहरु उनीसँगै पसीना चुहाउँथे । त्यसैबेला हो, उनको फेसन स्टाइल छाएको । स्टेज उक्लनुअघि उनी डिंगो बुट, बेली जिन्ससहितको आफ्नै सिग्नेचर गेटअपमा हुन्थे । समयक्रममा उनी सुस्ताए । र, अहिले उनको पुनरागमन भएको छ । फरक शैली र फरक धुनमा । र, बजारमा चर्चा छ, धिरज ब्याक अगेन ।

तपाईको प्रतिक्रिया

सम्बन्धित समाचार